ՑՈՒՐՏԸ ԲԱՐԻԱՑՆՈՒՄ Է ՄԱՐԴԿԱՆՑ

Կարմիր սառած քիթ, այտեր ու ականջներ: Առավոտյան տանը մոռացել էի գլխարկս: Մոռացել էի, որ արդեն ցրտերն ընկել են:

Դեռ աշխատանքի չհասած մայրիկը զանգեց ու շատ անհանգիստ հիշեցրեց, որ գլխարկս եմ մոռացել: Կյանքի ու մահու հարց է այդ գլխարկը: Եթե չես դնում, ուրեմն մայրիկը մտածում է, որ արդեն ճանապարհին, նույնիսկ դեռ գործի չհասած մրսել ես:

Աշխատանքի հասա ու բոլորն իմ սառած քթի նման սառած դեմքերով հարցրին.

                - Գխարկդ չե՞ս դրել:

Սկզբում մտածեցի, որ արդեն սովորել էին, որ սև գույնի վերարկուի ու մուգ կանաչ՝ կարելի է ասել սևից չտարբերվող շարֆի հետ կրում էի վառ դեղին գլխարկս: Հետո հասկացա, որ նրանք ուղղակի անհանգստացել են. մեկը կողքից տաթ թեյ էր առաջարկում, մյուսը հիշեցնում, որ մազերին ու գլխի մաշկին վնասակար է շատ սառը օդը: Իսկ երրորդը մայրիկիս նման արդեն մտածեց, որ հիվանդացա:

   Ցուրտը մի տեսակ բարիացնում է մարդկանց:

Առավոտյան ավելի ուշադիր ես, որ սիրելիդ գլխարկն ու շարֆը չմոռանա: Ցրտից մրսած մարդկանց ավելի շատ ես հրավիրում տաք թեյ խմելու ու անկախ ցանկությունից հանդիպումներն անպայման կայանում են:

Սառած ձեռքերով շփումներն առիթ են դառնում իրար ավելի մոտ նստելու ու տաքանալու:

Ցուրտը ջերմ հարաբերությունների նախապայմանն է: Իզուր չէ, որ ամենաբարի տոնն էլ զարդարում է ցուրտ գիշերները:

Հենց ցրտին ես գնահատում հարազատներիդ սերը, ուշադրությունը: Իսկ ցրտից ծնված սերն ամենաիսկականն է. ամենքը չեն կարող սիրել քեզ կարմիր քթով, այտերով և ականջներով...

Սիրեք ցուրտն ու երեկոյան ջերմ գրկեք նրան ում չեք ուզում, որ մրսի:

ԱՅՍ ԳԻՇԵՐ...

Այս գիշեր

Ես քեզանով պակաս եմ,

Ինձանից դատարկ…

Այս գիշեր

Երկինքն այնպես աղոտ է,

Խորթ է ամեն բան:

Այս գիշեր

Քո կարոտը ինձ մոտ է,

Լուռ եմ անսահման…

Այս գիշեր

Հոգիս քեզնով վիրավոր

Թռչունի նման:

ԻՍԿ Ի՞ՆՉ Է ՍԵՐԸ

Իսկ ի՞նչ է սերը,

Ես էլ քեզ նման չեմ կարող ասել,

Այն մեկ զգացմունք, եվ մեկ էլ խաղ է

Սրտի ու մտքի միջև է կանգնել:

Այն մեկ հանդարտվում ու հանգստանում

Իր բարիությամբ լցնում բոլորին,

Եվ մեկ էլ խանդով, նենգությամբ գերված

Ցավ է պատճառում անմեղ սրտերին:

Սերը մեկ վառվող խարույկի նման

Տաքացնում, հալում է սառույցե սրտեր,

Բայց պատահում է, որ ողջ գիշերը

Երկնակամարում հաշվում ես աստղեր:

Սերը ցնորված ծովի ալիք է,

Նավակները մերթ հրում է ծովեր,

Բայց պատահում է քամոտ պահերին

Առագաստները փրկում են նավեր:

Սերը երազի նման անուշ է,

Երբ սիրում ես դու, և սիրում են քեզ,

Երկու կողմում էլ խաղալը հեշտ է,

Կամ հաղթում ես դու, կամ էլ սերը քեզ:

Իսկ ի՞նչ է սերը,

Ես էլ քեզ նման չեմ կարող ասել,

Այն մեկ թախիծ է, մեկ` երջանկություն,

Բայց լավն են մարդիկ, երբ սիրել գիտեն:

ՍԻՐԻՐ ԻՆՁ ԱՅՆՊԵՍ...(ՀԵՂԻՆԱԿԱՅԻՆ)

Սիրիր ինձ այնպես, որ տաք ավազի փոշիներն անցնեն դեպի տիեզերք,

Սիրիր ինձ այնպես, ասես լուսինը իր վերջին լույսն է տալիս աշխարհին:

Ինձ այնպես սիրիր՝ անմարդկայնորեն, որ մարդկանց լեզվով ինձ չբացատրես, բայց ես հասկանամ,

Սիրիր ինձ այնպես, որ տաք օրերին մրսել ցանկանամ, որ դու ինձ գրկես:

Ինձ այնպես սիրիր, որ ինձ մոռանամ, քեզ հետ խոսելուց ես անէանամ ու քոնը դառնամ:

Պարզապես սիրիր առանց խոսքերի. դրանց վերքերը դժվար է մաքրել,

Պարզապես սիրիր առանց երգերի. դրանք հիշելով չեմ ուզում ապրել:
Ինձ այնպես սիրիր, որ երկնի ամեն կենդանի էակ քո սերը զգա.

Թող որ արևը հրով ճառագի, ամպերը թող լուռ թխպան երկնքում, ծովերի պարը թող հասնի ափեր և հորիզոնի ամեն անկյունում առկայծեն աստղեր:

Սիրիր ինձ այնպես, որ առանց քեզ էլ սերս չմարի, քեզ չտեսնելիս աչքս խավարի:

Պարզապես սիրիր. ինձ այսպես սիրիր:

12.02.2019

ՈՒՐԻՇ ՎԱՐԱԿ (ՀԵՂԻՆԱԿԱՅԻՆ)

Ես քեզ կսպասեմ, որ ինձ մոտ դառնաս,

Անդորրդ խառնեմ խենթություններիս,

Որ գաս դու ինձ մոտ, էլ ետ չդառնաս,

Որ քեզ նվիրեմ սիրտս ու հոգիս:

Որ հոգուս խորքում ջերմությունդ զգամ,

Որ մի ուրիշ կերպ դու ինձ վարակես,

Որ տանը վառենք սիրո խարույկներ,

Տաք գինով արբենք մինչև ուշ գիշեր:

Որ հորիզոնում արևը մեռնի,

Խավար գիշերը օրոր երգի մեզ,

Որ իմ սրտի մեջ՝ կյանքով, սիրով լի

Դրոշմվի քո ջինջ անունը հավերժ:

01.02.2019թ.

ԱՇՈՒՆՆ ՈՒ ԿԱՐՈՏՍ (ՀԵՂԻՆԱԿԱՅԻՆ)

Օրեր անցան, բարքեր անցան

Կարոտ վերքերս նորից արթնացան,

Նորից մշուշ ու ամպ իջավ,

Սար ու երկինք իրար միացան:

Ամպոտ ձորերը կանչում են հեռվից,

Քամին իր ձայնով երգեր է հյուսում,

Տխուր աշունը պինդ գրկել է ինձ

Նորից նույն մարդու սերն է երազում:

Նորից աշուններ ու բարքեր կանցնեն

Ու արշալույսներ կբացվեն նորից,

Բայց իմ կարոտը ամեն աշնան հետ

Ամպերի տեսքով հյուր կգա հեռվից:

01.11.2019թ.

Ո՞Վ ԿԴԱՌՆԱՄ ՔԵԶ ՀԱՄԱՐ ԵԹԵ ՀԱՆԿԱՐԾ ՔԵԶ ԿՈՐՑՆԵՄ

Քամի դառնամ քեզ համար

Վարագույրդ քիչ բացեմ,

Արև դառնամ քեզ համար

Մտնեմ սենյակ` արթնացնեմ:

Լույս կդառնամ քեզ համար

Ամեն օր քեզ կողջունեմ,

Ծով կդառնամ քեզ համար

Անուշ բույրեր կտարածեմ:

Ձյուն կդառնամ քեզ համար

Շուրթերիդ ջերմ կհալչեմ,

Ո՞վ կդառնամ քեզ համար

Եթե հանկարծ քեզ կորցնեմ:

01.11.2018թ.